അദാനിക്ക് ഒറ്റ ദിവസത്തിനുള്ളിൽ നഷ്ടം 53,000 കോടി രൂപയിലേറെ; ഓഹരികൾ ഇടിഞ്ഞു
അദാനി കമ്പനികളുടെ ഓഹരി വില രാവിലെ കൂപ്പു കുത്തി. അദാനി ഗ്രീൻ എനർജി ഒഴികെയുള്ള കമ്പനികൾ ചുവപ്പു കത്തി വ്യാപാരം അവസാനിപ്പിച്ചു. ഏകദേശം 53,000 കോടി രൂപിലേറെയാണ് അദാനി കമ്പനികളുടെ രാവിലത്തെ നഷ്ടം. എന്നാൽ പിന്നീട് തിരിച്ചുകയറി. സെൻസെക്സും നിഫ്റ്റിയും ഫ്ലാറ്റായി വ്യാപാരം അവസാനിപ്പിച്ചു. അതേസമയം സെബി ചെയർപെഴ്സൺ മാധബി പുരി ബുച്ചും ഭർത്താവ് ധവൽ ബുച്ചും അദാനി ഗ്രൂപ്പും ഹിൻഡൻബർഗ് ആരോപണങ്ങൾ തള്ളിക്കളഞ്ഞിരുന്നു
ഒറ്റ ദിവസത്തിനുള്ളിൽ 53,000 കോടി രൂപയുടെ നഷ്ടം. ഹിൻഡൻബർഗ് റിപ്പോർട്ടിന് ശേഷം രാവിലത്തെ ട്രേഡിങ്ങിൽ അദാനി ഓഹരികൾ ഏഴു ശതമാനം വരെ ഇടിഞ്ഞു.10 അദാനി ഓഹരികളുടെ മൊത്തം വിപണി മൂല്യം 16.7 ലക്ഷം കോടി രൂപയായി കുറഞ്ഞിരുന്നു. എന്നാൽ ഉച്ചകഴിഞ്ഞ് ഈ നഷ്ടം വീണ്ടെടുത്തു.
അദാനി ഗ്രീൻ എനർജി ഓഹരികൾ ആണ് രാവിലെ ഏറ്റവും കൂടുതൽ ഇടിഞ്ഞത്. തുടക്കത്തിൽ ഏഴു ശതമാനത്തോളം ഇടിഞ്ഞ് 52 ആഴ്ചയിലെ ഏറ്റവും താഴ്ന്ന നിലവാരത്തിൽ ഓഹരി വില എത്തിയിരുന്നു. 1656 രൂപ വരെയായി ആണ് ഓഹരി വില ഇടിഞ്ഞത്. എന്നാൽ പിന്നീട് തിരിച്ചു കയറി.
അദാനി ടോട്ടൽ ഗ്യാസ് ഓഹരികൾ , അദാനി പവർ അദാനി വിൽമർ, അദാനി എനർജി സൊല്യൂഷൻസ്, അദാനി എൻ്റർപ്രൈസസ് എന്നീ ഓഹരികളും ഇടിഞ്ഞു. നിഫ്റ്റിയിൽ രാവിലത്തെ സെഷനിൽ അദാനി പോർട്ട്സ് ഓഹരികൾ ഏകദേശം രണ്ട് ശതമാനം ഇടിഞ്ഞു. പ്രധാന അദാനി ഗ്രൂപ്പ് കമ്പനിയായ അദാനി എൻ്റർപ്രൈസസും ചുവപ്പുകത്തി തന്നെ വ്യാപാരം അവസാനിപ്പിച്ചു. എന്നാൽ രാവിലത്തെ കനത്ത നഷ്ടം ഉച്ചകഴിഞ്ഞ് വീണ്ടെടുത്തിരുന്നു.
ഹിൻഡൻബർഗ് റിസേർച്ചിൻ്റെ പുതിയ റിപ്പോർട്ട് ആണ് ഓഹരികളിലെ ഇടിവിന് കാരണം. ഗൗതം അദാനിയുടെ സഹോദരൻ വിനോദ് അദാനിയുടെ നേതൃത്വത്തിലെ ബെർമുഡ, മൗറീഷ്യസ് ഫണ്ടുകളിൽ സെബി മേധാവി ബുച്ചിനും അവരുടെ ഭർത്താവ് ധവൽ ബുച്ചിനും നിക്ഷേപമുണ്ടെന്ന ആരോപണമാണ് അദാനി ഓഹരികളെ ബാധിച്ചത്. അദാനി വിഷയത്തിലെ അന്വേഷണത്തിന് സെബിയ്ക്ക് എങ്ങനെ വസ്തുനിഷ്ഠമായി അന്വേഷണം നടത്താൻ ആകും എന്നാണ് ചോദ്യം. പ്രതിപക്ഷം ബുച്ചിൻ്റെ രാജി ആവശ്യപ്പെട്ടിട്ടുണ്ട്. ഹിൻഡൻബർഗ് റിപ്പോർട്ടിൽ ജെപിസി അന്വേഷണവും ആവശ്യപ്പെട്ടിട്ടുണ്ട്. അതേസമയം സെബി ചെയർപേഴ്സൺ എല്ലാ ആരോപണങ്ങളും നിഷേധിച്ചിരുന്നു.
റിപ്പോർട്ട് തള്ളി വിപണി
അതേസമയം മാർക്കറ്റ് അനലിസ്റ്റുകൾ റിപ്പോർട്ട് സെൻസേഷണൽ ആണെന്ന് ആരോപിച്ച് തള്ളിക്കളഞ്ഞു. ഓഹരി വിലയിൽ ഇതിന് വലിയ സ്വാധീനം ചെലുത്താൻ ആയില്ല. സെബി ചെയർപെഴ്സൺ മാധബി പുരി ബുച്ചും ഭർത്താവ് ധവൽ ബുച്ചും റിപ്പോർട്ട് നിഷേധിക്കുകയും റിപ്പോർട്ടിലെ അവകാശവാദങ്ങൾ അടിസ്ഥാനരഹിതമാണെന്ന് വ്യക്തമാക്കുകയും ചെയ്തിരുന്നു. ആരോപണങ്ങൾ അദാനിയും നിരസിച്ചു. തങ്ങളുടെ വിദേശ നിക്ഷേപങ്ങളുടെ ഘടന പൂർണ്ണമായും സുതാര്യമാണെന്നാണ് കമ്പനി അറിയിച്ചിരിക്കുന്നത്.
ഗൗതം അദാനിയ്ക്ക് വിമാനത്താവള നടത്തിപ്പ്, പോർട്ട് മാനേജ്മന്റ് , പുനരുപയോഗ ഊർജ രംഗം തുടങ്ങി വിവിധ മേഖലകളിൽ നിക്ഷേപമുണ്ട്. അദാനി ഗ്രൂപ്പിനെതിരെ ഓഹരി പെരുപ്പിക്കലും അക്കൗണ്ടിങ് തട്ടിപ്പുകളും ആരോപിച്ച് 18 മാസങ്ങൾക്ക് മുമ്പാണ് ഹിൻഡൻബർഗ് രംഗത്ത് എത്തിയത്. തുടർന്ന് അദാനി ഗ്രൂപ്പ് കമ്പനികൾ കൂപ്പു കുത്തിയെങ്കിലും ഓഹരികൾ പിന്നട് തിരിച്ചുകയറിയിരുന്നു. എല്ലാ ആരോപണങ്ങളും ഗൗതം അദാനി നിഷേധിച്ചു.
