ഒക്ടോബർ മുതൽ വിദേശ നിക്ഷേപകർ വിറ്റഴിച്ചത് 1.5 ലക്ഷം കോടി രൂപ. നവംബറിലും ഇതേ ട്രെൻഡ് തുടരുകയാണ്. തുടർച്ചയായ രണ്ടാം മാസവും വിദേശ നിക്ഷേപകർ ഓഹരികൾ വിറ്റഴിക്കുകയാണ്. ജൂൺ മുതൽ സെപ്‌റ്റംബർ വരെയുള്ള നാല് മാസക്കാലം വിദേശനിക്ഷേപകർ ഓഹരികൾ വലിയ തോതിൽ വാങ്ങിയെങ്കിൽ പിന്നീട് വിറ്റഴിക്കുന്നവരായി. വിവിധ ആഗോള, ആഭ്യന്തര ഘടകങ്ങൾ ഇതിനു പിന്നിലുണ്ട്.
ഉയർന്ന മൂല്യം മാത്രമല്ല കമ്പനികളുടെ വരുമാനം നിരാശാജനകമായിരുന്നതും വിദേശ നിക്ഷേപകരെ ബാധിച്ചു. ഒക്ടോബർ മുതൽ 1,55,730 കോടി രൂപയാണ് നിക്ഷേപകർ വിറ്റഴിച്ചത്.
നവംബർ 22 വരെ വിദേശ സ്ഥാപന നിക്ഷേപകർ തുടർച്ചയായി ഓഹരികൾ വിറ്റഴിച്ചിട്ടുണ്ട്. ഒക്ടോബറിൽ എക്‌സ്‌ചേഞ്ചുകൾ വഴി 1,13,858 കോടി രൂപയുടെ ഓഹരികളാണ് വിറ്റഴിച്ചത്. നവംബർ ആദ്യം മുതൽ 22 വരെ എക്‌സ്‌ചേഞ്ചുകളിലൂടെ 41,872 കോടി രൂപയുടെ ഓഹരികൾ വിറ്റു.
അതേസമയം ഇന്ത്യൻ നിക്ഷേപകർ ഈ വർഷം ആദ്യ പത്ത് മാസങ്ങളിൽ 7000 കോടി ഡോളറിലധികമാണ് ഇന്ത്യൻ ഓഹരികളിൽ നിക്ഷേപിച്ചിരിക്കുന്നത്. ഇത് റെക്കോർഡാണ്. വിദേശ നിക്ഷേപകർ ഓഹരികൾ വിറ്റഴിക്കുമ്പോൾ ആഭ്യന്തര നിക്ഷേപകർ ഓഹരികൾ വാങ്ങുന്നുണ്ടെന്നത് ശ്രദ്ധേയമാണ്.
ചൈനയ്ക്ക് അധിക നികുതി ചുമത്തുമെന്ന് സൂചന നൽകിയിരിക്കുകയാണ് ട്രംപ്. പുതിയ നിരക്ക് വർധന ഡോളറിൻ്റെ മൂല്യം ഉയരാൻ കാരണമായിട്ടുണ്ട്. ഇത് മിക്ക ഏഷ്യൻ വിപണികളെയും ബാധിച്ചു. ചൈനയിൽ മാത്രമല്ല മെക്സിക്കോ, കാനഡ എന്നിവിടങ്ങളിലും പുതിയ നികുതി ചുമത്തുമെന്ന് ഡൊണാൾഡ് ട്രംപ് മുന്നറിയിപ്പ് നൽകി. മെക്സിക്കോയ്ക്കും കാനഡയ്ക്കും 25 ശതമാനമാണ് താരിഫ് വർധന.
