നല്ല പ്രായത്തില്‍ അഭിനയിക്കാന്‍ വന്നപ്പോള്‍ ഗ്ലാമര്‍ വേഷങ്ങളില്‍ തളച്ചിട്ട കനിഹയ്ക്ക് മോചനം കിട്ടിയത്,, വിവാഹത്തിന് ശേഷം മലയാള സിനിമയിലേക്ക് വന്നതിന് ശേഷമാണ്. കനിഹയുടെ കരിയര്‍ ശരിക്കും പ്രചോദനം തന്നെയാണ്
പേര് ദിവ്യ വെങ്കടസുബ്രഹ്‌മണ്യം അയ്യര്‍, സ്റ്റേജ് നെയിം കനിഹ സുബ്രഹ്‌മണ്യം, വയസ്സ് 42! ജീവിതത്തെ ഇത്രയധികം പോസിറ്റീവായി കാണുന്ന മറ്റൊരു നടി ഉണ്ടായിരിക്കില്ല.
ഇന്‍സ്റ്റഗ്രാം പോസ്റ്റില്‍ പോസിറ്റീവായ ക്യാപ്ഷന്‍സ് പങ്കുവയ്ക്കുക മാത്രമല്ല കനിഹ, ജീവിതത്തില്‍ അത് പ്രാവര്‍ത്തികമാക്കുകയും ചെയ്യുന്നുണ്ട്. പല സ്റ്റേജുകളിലും കനിഹ പറഞ്ഞ അത്തരം വാക്കുകള്‍ വൈറലായിരുന്നു.
കനിഹയുടെ കരിയര്‍ തന്നെ വളരെ പ്രചോദനമാണ്. 2001 ല്‍ മിസ് ചെന്നൈ മത്സരത്തില്‍ സെക്കന്റ് റണ്ണര്‍ അപ് ആയിരുന്നു കനിഹ. ഒരു മാഗസിന്‍ കവറില്‍ കനിഹയുടെ ഫോട്ടോ കണ്ടിട്ടാണ് സുസി ഗണേശന്‍ തന്നെ സിനിമയിലേക്ക് വിളിക്കുന്നത്.
മണിരത്‌നം നിര്‍മിച്ച ചിത്രത്തില്‍ പ്രസന്നനായിരുന്നു നായകന്‍. പ്രസന്നന്റെയും ആദ്യ സിനിമയായിരുന്നു. സ്‌കൂള്‍ വെക്കേഷന്‍ സമയത്ത് ഷൂട്ടിങ് പൂര്‍ത്തിയാക്കി. സിനിമ മികച്ച വിജയമായിരുന്നു. അതിന് ശേഷം വന്ന അവസരങ്ങള്‍ പഠനത്തെ ബാധിക്കാതെയാണ് കനിഹ ചെയ്തിരുന്നത്.
ഒരു ഘട്ടം കഴിഞ്ഞപ്പോള്‍ പഠനം കഴിഞ്ഞിട്ട് മതി ആക്ടിങ് എന്ന് തീരുമാനിച്ചു. അങ്ങനെ മെക്കാനിക്കല്‍ എനിജനിയറിങ് പഠനം പൂര്‍ത്തിയാക്കിതിന് ശേഷം കന്നട സിനിമയിലൂടെ നായികയായി കനിഹ രണ്ടാം ഇന്നിങ്‌സ് നടത്തി.
പക്ഷെ അത്ര സൂപ്പര്‍ ഹിറ്റായ പടങ്ങളോ സംഭവിക്കുകയോ, മുന്‍നിര നായികയായി വളരാനോ അപ്പോള്‍ കനിഹയ്ക്ക് സാധിച്ചിരുന്നില്ല. 2006 വരെ കന്നട – തമിഴ്- തെലുങ്ക് ഭാഷകളില്‍ നിരവധി സിനിമകള്‍ ചെയ്തുവെങ്കിലും കനിഹയ്ക്ക് കാര്യമായൊരു ബ്രേക്ക് കിട്ടിയില്ല.
2008 ല്‍ ആണ് കനിഹയുടെ വിവാഹം കഴിഞ്ഞത്. ശ്യാം രാധാകൃഷ്ണനുമായുള്ള വിവാഹത്തിന് ശേഷം കരിയറില്‍ നിന്ന് ഒരു വര്‍ഷത്തെ ബ്രേക്ക് എടുത്ത നടി പിന്നീട് തിരിച്ചുവന്നത് മലയാള സിനിമയിലേക്കാണ്. അതൊരു ഗംഭീര തുടക്കമായിരുന്നു. ഭാഗ്യദേവത എന്ന സിനിമയിലൂടെ മലയാളത്തിലേക്ക് എത്തിയ കനിഹ പിന്നീട് മലയാള സിനിമയുടെ ഭാഗ്യനായികയായി.
പഴശ്ശിരാജ, മൈ ബിഗ് ഫാദര്‍, ദ്രോണ, ക്രിസ്റ്റിയന്‍ ബ്രദേഴ്‌സ്, കോബ്ര, സ്പിരിറ്റ്, ബാവൂട്ടിയുടെ നാമത്തില്‍ അങ്ങനെ ഒന്നിനു പിറകെ ഒന്നായി സൂപ്പര്‍ താര ചിത്രങ്ങള്‍ മാത്രമാണ് ആ കാലത്ത് കനിഹയെ തേടിയെത്തിയത്. എല്ലാം സൂപ്പര്‍ ഡ്യൂപ്പര്‍ ഹിറ്റ്. അതിനിടയില്‍ മകനെ പ്രസവിക്കാന്‍ വേണ്ടി മാത്രം ചെറിയ ബ്രേക്ക്ക് എടുത്തിരുന്നു.
പ്രസവാനന്തരം ഒരു ചെയ്ത ഫാഷന്‍ ഷോയില്‍, ചുക്കി ചുളിഞ്ഞ വയര്‍ കാണിച്ചുകൊണ്ട് കനിഹ റാംപ് വാക്ക് നടത്തിയത് വലിയ വാര്‍ത്തയായിരുന്നു. ഞാന്‍ ഒരു അമ്മയായി എന്നതിന്റെ ഏറ്റവും മനോഹരമായ തെളിവാണ് അത്. അതിനൊരു ഭംഗിയുണ്ട് എന്നായിരുന്നു അന്ന് കനിഹയുടെ മറുപടി.
എനിക്ക് വേണമെങ്കില്‍ ഒരു പ്ലാസ്റ്റിക് സര്‍ജറിയിലൂടെ ഈ പാടുകള്‍ മാറ്റാം, പക്ഷെ അത് ഞാന്‍ ആഗ്രഹിക്കുന്നില്ല. ഈ പാടുകളില്‍ ഞാന്‍ എന്ന അമ്മ അഭിമാനിക്കുന്നു എന്നായിരുന്നു കനിഹയുടെ മറുപടി.
അപ്പോഴും, ഇപ്പോഴും കനിഹയ്ക്ക് ഏറ്റവും അധികം പിന്തുണ നല്‍കിയത് ഭര്‍ത്താവ് ശ്യാം തന്നെയാണ്. എന്നാല്‍ ഇടക്കാലത്ത് ഇരുവരും വേര്‍പിരിഞ്ഞു എന്ന തരത്തിലുള്ള വാര്‍ത്തകള്‍ വളരെ ശക്തമായി പ്രചരിച്ചിരുന്നു.
ഭര്‍ത്താവിനൊപ്പമുള്ള മനോഹരമായ ഒരു ഫോട്ടോ പങ്കുവച്ചുകൊണ്ടാണ് അതിന് കനിഹ മറുപടി നല്‍കിയത്. കുഞ്ഞുടുപ്പിന്റെ പേരില്‍ വിമര്‍ശനങ്ങള്‍ നേരിടേണ്ടി വന്നപ്പോഴും, കനിഹ മൈന്റ് ചെയ്തില്ല. തന്റെ ശീലങ്ങള്‍ ഒന്നും മാറ്റിയതുമില്ല.
പ്രായമാവുന്നതിനെ ഞാന്‍ വളരെ അധികം ആസ്വദിയ്ക്കുന്നു. എന്റെ ഓരോ പുതിയ വര്‍ഷത്തെയും കൂടുതല്‍ എക്‌സൈറ്റ്‌മെന്റോടുകൂടെയാണ് കാണുന്നത് എന്ന് ഒരിക്കല്‍ കനിഹ പറഞ്ഞിരുന്നു.
സിനിമകളില്‍ അവസരം കുറഞ്ഞപ്പോള്‍, സീരിയലിലേക്ക് മാറാനും കനിഹയ്ക്ക് മടിയൊന്നും ഉണ്ടായിരുന്നില്ല. അഭിനയം എന്റെ തൊഴിലാണ്, അത് മിനിസ്‌ക്രീനില്‍ ആയാലും പ്രശ്‌നമില്ല എന്ന മനോഭാവമായിരുന്നു കനിഹയ്ക്ക്. സോഷ്യല്‍ മീഡിയ ട്രന്റുകള്‍ക്കൊപ്പം സഞ്ചരിയ്ക്കുന്ന നടിയുടെ പുതിയ റീല്‍ വീഡിയോയും ആരാധകര്‍ ഏറ്റെടുത്തിട്ടുണ്ട്.
