നിരവധി അവസരങ്ങളും വന്നിട്ടും നോ പറഞ്ഞു, എന്തുകൊണ്ട് പിന്നെ ഈ സിനിമ? ആ ഒരൊറ്റക്കാര്യം ആദ്യം നോക്കി! മേതില്‍ ദേവിക പറയുന്നു.
നര്‍ത്തകിയായ മേതില്‍ ദേവിക അഭിനയ ലോകത്ത് തുടക്കം കുറിക്കുകയാണ്. കഥ ഇന്നുവരെ എന്ന ചിത്രത്തിന്റെ പോസ്റ്റര്‍ എല്ലാം വളരെ ശ്രദ്ധ നേടി. പല അവസരങ്ങളും ഇതിന് മുന്‍പേ വന്നിട്ടും, എല്ലാത്തിനോടും നോ പറഞ്ഞു. എന്നാൽ എന്തുകൊണ്ടാണ് ഈ സിനിമ ചെയ്യുന്നത് എന്ന് മേതില്‍ ദേവിക വ്യക്തമാക്കുന്നു.
അടുത്തിടെയാണ് മേതില്‍ ദേവിക സിനിമാ രംഗത്തേക്ക് ചുവട് വെച്ചത്. ബിജു മേനോന്‍ നായകനാകുന്ന ഈ ചിത്രം സംവിധാനം ചെയ്യുന്നത് വിഷ്ണു മോഹനാണ്. എന്തുകൊണ്ട് ഈ സിനിമിയില്‍ അഭിനയിക്കാന്‍ തീരുമാനിച്ചു എന്ന് തുറന്നുപറഞ്ഞിരിക്കുകയാണ് നടി ഇപ്പോള്‍.
മലയാളികള്‍ക്ക് പരിചയപ്പെടുത്തല്‍ വേണ്ടാത്ത പേരാണ് മേതില്‍ ദേവിക. നര്‍ത്തകി എന്ന നിലയില്‍ ശ്രദ്ധേയയായ മേതില്‍ ദേവിക അഭിനയിക്കുന്ന ആദ്യ ചിത്രമാണ് റിലീസിന് ഒരുങ്ങുന്നത്. കഴിഞ്ഞ 25 വര്‍ഷത്തിനിടെ നായികയായി സിനിമകളില്‍ നിരവധി അവസരം ലഭിച്ചെങ്കിലും ഇവ വേണ്ടെന്ന് വച്ച് നൃത്തത്തില്‍ ശ്രദ്ധ നല്‍കാനാണ് മേതില്‍ ദേവിക തീരുമാനിച്ചത്.
”പണ്ടേ ഒട്ടേറെ അവസരം ലഭിച്ചതല്ലേ, എന്തുകൊണ്ട് അന്ന് അഭിനയിച്ചില്ല എന്ന് പലരും ചോദിക്കുന്നു. അന്ന് താല്‍പര്യമില്ലായിരുന്നു. കംഫര്‍ട്ടബിള്‍ അല്ലെന്ന് തോന്നിയിരുന്നു. ഇപ്പോള്‍ ഈ ടീം നല്ലതെന്ന് തോന്നിയതുകൊണ്ട് യെസ് പറഞ്ഞു. അതിനുശേഷമാണ് സ്‌ക്രിപ്റ്റും പണവും എല്ലാം…” ഒരു മാധ്യമ അഭിമുഖത്തില്‍ നടി പറഞ്ഞു.
ഹേമാ കമ്മിറ്റി റിപ്പോര്‍ട്ട് ഞെട്ടിച്ചില്ലെന്ന് നേരത്തെ മേതില്‍ ദേവിക പ്രതികരിച്ചിരുന്നു. എല്ലാവര്‍ക്കും അറിയുന്ന കാര്യമല്ലേ റിപ്പോര്‍ട്ടിലുള്ളത്. ഇത് പുറത്തുവന്നത് കൊണ്ട് പ്രശ്നങ്ങളുടെ തീവ്രത ആളുകള്‍ക്ക് മനസിലാക്കാനായി. സിനിമയിലെ നടന്‍മാര്‍ ജീവിതത്തിലും ഹീറോ ആകാന്‍ ശ്രമിക്കണമെന്നും നടി പ്രതികരിച്ചിരുന്നു. അംഗമല്ലെങ്കിലും ഡബ്ല്യുസിസിയെ പൂര്‍ണമായും പിന്തുണയ്ക്കുന്നുവെന്നും പറഞ്ഞു. പ്രശ്നപരിഹാരത്തിന് സിനിമയിലെ ഉത്തരവാദിത്തപ്പെട്ട ആളുകൾ ഇടപെടണം. പുറത്ത് നിന്നുള്ളവര്‍ ഇടപെട്ടാല്‍ വിഷയം കൂടുതല്‍ സങ്കീര്‍ണമാകുമെന്നും മേതില്‍ ദേവിക പ്രതികരിച്ചു.
സെപ്റ്റംബര്‍ മാസത്തില്‍ റിലീസിന് ഒരുങ്ങുന്ന ”കഥ ഇന്നുവരെ”യില്‍ നിഖില വിമല്‍, ഹക്കീം ഷാജഹാന്‍, അനുശ്രീ, അനു മോഹന്‍, സിദ്ധിഖ്, രഞ്ജി പണിക്കര്‍, കോട്ടയം രമേശ്, കൃഷ്ണപ്രസാദ്, അപ്പുണ്ണി ശശി, കിഷോര്‍ സത്യ, ജോര്‍ഡി പൂഞ്ഞാര്‍ തുടങ്ങിയ പ്രമുഖ ആളുകൾ അഭിനയിക്കുന്നു. വിഷ്ണു മോഹന്‍ സ്റ്റോറീസിന്റെ ബാനറില്‍ വിഷ്ണു മോഹനും, ഒപ്പം ജോമോന്‍ ടി ജോണ്‍, ഷമീര്‍ മുഹമ്മദ്, ഹാരിസ് ദേശം, അനീഷ് പിബി, കൃഷ്ണമൂര്‍ത്തി എന്നിവർചേർന്നാണ് ‘കഥ ഇന്നുവരെ’ എന്ന ചിത്രം നിര്‍മിക്കുന്നത്.
